مارکسزم اور ادب، ایک علمی نشست کا احوال

ایلن ووڈز نے کہا کہ ادبی تخلیق اور پروپیگنڈا میں بہت فرق ہوتا ہے. شاعری انسان کی روح اور جذبات کی آئینہ دار ہوتی ہے جبکہ پروپیگنڈا انسانی دماغ سے جنم لیتا ہے اور معیار میں کم تر ہوتا ہے. وہ برصغیر پاک و ہند کی شاعری سے بےحد متاثر ہیں کیونکہ ظاہری طور پر ترقی یافتہ دنیا میں، جہاں وہ رہتے ہیں، ادب اس وقت زوال کا شکار ہے. یورپ میں ادب کا زوال ہوس زر کا نتیجہ ہے. شاعری میں پیسے نہیں ہوتے لیکن پیسوں میں بھی شعری لطافت نہیں ہوتی. پاکستان میں فیض احمد فیض کی ادبی خدمات کو بالخصوص سراہتے ہوئے ان کا کہنا تھا کہ ان کی دانست میں پاکستان کے نوجوان انقلابی شعراء فیض کے بچے ہیں.

کارل مارکس کے ادبی ذوق اور رحجان کا ذکر کرتے ہوئے معروف مصنف اور محقق نے کہا کہ مارکس نہ صرف شیکسپیئر جیسے ترقی پسند ادیب کا مداح تھا بلکہ بہت سے رجعت پسند ادیبوں کو بھی پڑھا کرتا تھا اور ان کی تعریف کرتا تھا. ان کے نزدیک نوجوانوں کو کارل مارکس پر کتابیں پڑھنے کی بجائے اس کو براہ راست پڑھنا چاہیے کیونکہ اس کے بارے میں 99% کتب اس کے بدترین دشمنوں کی تحریر کردہ ہیں، جنھوں نے ہمیشہ اس کے بارے میں بدترین جھوٹ لکھ کر مارکسزم کا چہرہ مسخ کرنے کی کوشش کی.

آخر میں کامریڈ نے شرکاء کے سوالات کے جواب دیتے ہوئے کہا کہ دنیا میں اس وقت افراتفری اور انتشار کی فضا موجود ہے. تاریخ گواہ ہے کہ اس طرح کے ماحول میں ہمیشہ انقلابات نے جنم لیا ہے. کامریڈز کو انفرادی فوائد حاصل کرنے کی بجائے اجتماعی فلاح کے لیے جدوجہد کرنا چاہیے. دنیا کی سائنسی ترقی، ایجادات، تہذیب و تمدن اور ثقافت کو ایٹمی جنگ اور تباہی سے بچانے کا واحد راستہ سوشلسٹ جدوجہد اور انقلاب ہے.”