شریعت کی قبا والے وہ سب مہرو وفا والے بہتر کربلا والے
وہی تو تھے خدا والے محمد مصطفی والے بہتر کربلا والے
وہ فخر ِ دوجہاں ٹھہرے وہ دیں کا سائباں ٹھہرے فلک کی کہکشاں ٹھہرے
وہ رحمت کی گھٹا والے خزاؤں میں صبا والے بہتر کربلا والے
وہی سب نازِ شریعت ہیں حروف ِ جامعیت ہیں وہی رمزَ حقیقت ہیں
وہ ہیں سوزو وفا والے انوکھی ہر ادا والے بہتر کربلا والے
انہیں عہدِ وفا دیکھیں محمد کی دعا دیکھیں خدا کی اک عطا دیکھیں
وہ ہیں جام ِبقا والے رضا کی انتہا والے بہتر کربلا والے
انہیں جانِ جہاں کہیے انہیں حق کی زباں کہیے انہیں جائے اماں کہیے
معطر سی فضا والے وہ تھے صبح ِ ضیا والے بہتر کربلا والے
وہی ہیں ساحل و منزل وہ جب تھے رونقِ مقتل کہاں تھا ہائے میں فیصل
شبیہِ مصطفٰی والے وہ تھے حق کی صدا والے بہتر کربلا والے
شاعر: فیصل زمان چشتی
